Yerga yaxshi qarov bilan mehr berilsa insonga albatta yaxshi rizq va daromad keltiradi. Buni yaxshi anglagan kimsa borki har qarich yerdan unumli foydalanib oilasi to‘kinchiligiga zamin yaratadi.
Arabmozor mahalla fuqarolar yig‘inida istiqomat qilayotgan, hozirda Qanjirg‘a mahalla fuqarolar yig‘ini xotin-qizlar faoli vazifasida mehnat qilayotgan Rohatoy Saidmaxmudova ham yerga mehr berib kam bo‘lmayapti. Avvaliga oliy ma’lumotli o‘qituvchi sifatida faoliyat yuritib, mana 15 yildirki mahalla tizimida samarali xizmat qilayotgan R. Saidmahmudova yashash xonadonida issiqxona tashkillab limonchilikni yo‘lga qo‘ygan.
Davlatimiz tomonidan ajratilayotgan imtiyozli kreditdan unumli foydalangan R. Saidmaxmudova 2021 yilda 13 million so‘m kredit olib 3 sotixli issiqxona tashkillagan. Unga 25 tup limon ko‘chati ekib daromadga kirguniga qadar pomidor ko‘chatlarini yetishtirib issiqxonadan samarali foydalangan.
—Mahalla xotin-qizlar faoli sifatida mehnat qilar ekanman, hudud xotin-qizlarini ham uyda o‘tirib daromad manbaini yaratishlariga undayman. Hozirda hududimizda tadbirkor ayollarimiz safi kengaygan. Ular orasida tikuvchilik, pazandachilik, menga o‘xshab issiqxona tashkillab yer bilan tillashayotgan xotin-qizlarimizga qo‘limdan kelganicha maslahat va ko‘mak berish harakatidaman,—deydi R. Saidmahmudova.
Bugun nafaqat davlat ishlarida, balki qishloq xo‘jaligida ham xotin-qizlarimizning faol ishtiroki quvonarli hol, albatta. Qahramonimiz ham mehnat qilib kam bo‘lmayapti. O‘tgan yilning o‘zida limondan 50 million so‘m daromad olinib oila to‘kinchiligi ta’minlanmoqda.
—Issiqxona tashkillab undan yaxshi manfaatdor bo‘lmoqdamiz. Buning ortidan farzandlarni o‘qitib to‘ylar qildik, uy-joy va avtomashina ham olishga erishdik. Albatta barchasi mehnatning samarasi, yerdan unumli foydalanishning foydasi deb o‘ylayman. Bu yil limon hosilini 3,5 tonnadan oshirishni niyat qilganmiz,—deydi R. Saidmahmudova.
Shohistaxon RAHIMOVA.
***
ЕРГА МЕҲР БЕРСАНГ…
Ерга яхши қаров билан меҳр берилса инсонга албатта яхши ризқ ва даромад келтиради. Буни яхши англаган кимса борки ҳар қарич ердан унумли фойдаланиб оиласи тўкинчилигига замин яратади.
Арабмозор маҳалла фуқаролар йиғинида истиқомат қилаётган, ҳозирда Қанжирға маҳалла фуқаролар йиғини хотин-қизлар фаоли вазифасида меҳнат қилаётган Роҳатой Саидмахмудова ҳам ерга меҳр бериб кам бўлмаяпти. Аввалига олий маълумотли ўқитувчи сифатида фаолият юритиб, мана 15 йилдирки маҳалла тизимида самарали хизмат қилаётган Р. Саидмаҳмудова яшаш хонадонида иссиқхона ташкиллаб лимончиликни йўлга қўйган.
Давлатимиз томонидан ажратилаётган имтиёзли кредитдан унумли фойдаланган Р. Саидмахмудова 2021 йилда 13 миллион сўм кредит олиб 3 сотихли иссиқхона ташкиллаган. Унга 25 туп лимон кўчати экиб даромадга киргунига қадар помидор кўчатларини етиштириб иссиқхонадан самарали фойдаланган.
—Маҳалла хотин-қизлар фаоли сифатида меҳнат қилар эканман, ҳудуд хотин-қизларини ҳам уйда ўтириб даромад манбаини яратишларига ундайман. Ҳозирда ҳудудимизда тадбиркор аёлларимиз сафи кенгайган. Улар орасида тикувчилик, пазандачилик, менга ўхшаб иссиқхона ташкиллаб ер билан тиллашаётган хотин-қизларимизга қўлимдан келганича маслаҳат ва кўмак бериш ҳаракатидаман,—дейди Р. Саидмаҳмудова.
Бугун нафақат давлат ишларида, балки қишлоқ хўжалигида ҳам хотин-қизларимизнинг фаол иштироки қувонарли ҳол, албатта. Қаҳрамонимиз ҳам меҳнат қилиб кам бўлмаяпти. Ўтган йилнинг ўзида лимондан 50 миллион сўм даромад олиниб оила тўкинчилиги таъминланмоқда.
—Иссиқхона ташкиллаб ундан яхши манфаатдор бўлмоқдамиз. Бунинг ортидан фарзандларни ўқитиб тўйлар қилдик, уй-жой ва автомашина ҳам олишга эришдик. Албатта барчаси меҳнатнинг самараси, ердан унумли фойдаланишнинг фойдаси деб ўйлайман. Бу йил лимон ҳосилини 3,5 тоннадан оширишни ният қилганмиз,—дейди Р. Саидмаҳмудова.
Шоҳистахон РАҲИМОВА.
About The Author
