Tumanimizning Qipchoqariq mahalla fuqarolar yig‘ini o‘zining tadbirkor, chorvador va dexqonlari bilan tumanimizda o‘z o‘rniga ega mahallalardan biri hisoblanadi. Ushbu maskanga qilgan safarimizda bizga mahalla hokim yordamchisi Nodirbek Nabiyev hamrohlik qildi.
Mahalla asosan 3 ta – Qipchoqariq, Bekto‘pi va Nasaf ko‘chalaridan iborat bo‘lib hududda 724 ta xonadon, 1149 ta oila, ularda esa 4025 nafar aholi istiqomat qiladi. Mahallaning 37 gektar maydoni aholi xonadonlari uchun berilgan bo‘lib, asosan ular dehqonchilik va chorvachilik bilan shug‘ullanadilar. 1 ta umumiy o‘rta ta’lim maktabi, 10 dan ortiq davlat va nodavlat maktabgacha ta’lim tashkilotlarida mahalla bolalariga sifatli ta’lim-tarbiya berib kelinayotgan bo‘lsa, mavjud oilaviy shifokorlik punktida fuqarolarga tibbiy xizmat ko‘rsatib kelinmoqda.
Mahalla uzoq tarixga ega. Hududda ikkita — “Mahsum ota” va “Quloq ota” ziyoratgohlari mavjud bo‘lib bu ziyoratgohlarga uzoq yaqindan ziyoratchilar oqimi tinmaydi. Bu ziyoratgohlarning o‘ziga yarasha tarixi borligini ta’kidlashdi.
Mahalla aholisining bugunidan rozi, ertasiga umid bilan yashashlari yo‘lida mahalla yettiligi tunu-kun harakatda. Mahalla raisi Erkinjon Usmonov boshchiligidagi jamoa sa’y-harakatlari bilan mahalla tumandagi ilg‘or hududlar sarasiga kirib ulgurgan. Ular mahalladagi kambag‘al oilalarni kambag‘allikdan chiqarish, ishsizlarni ish bilan ta’minlash, tadbirkorlik istagidagi fuqarolarga ish boshlashlari uchun yo‘l-yo‘riqlar ko‘rsatish barobarida zarur kredit mablag‘larini olishlariga ko‘maklashish, yoshlarni bilim olib yurt ravnaqi uchun hissa qo‘shadigan kadrlar bo‘lib yetishishlari yo‘lida o‘zlaridagi bor bilim va ko‘nikmalarini safarbar qilib kelmoqdalar.
– Bu yilgi quvonarli yutuqlarimizdan biri “Tashabbusli budjet” loyihasida mahallamiz ishtirok etib 1 yarim milliard so‘m evaziga hududimizning 3089 metr ichki yo‘llarini asfaltlashtirish imkoniyatiga ega bo‘lganimiz,- deydi mamnuniyat bilan mahalla raisi E. Usmonov. – Bu albatta fuqarolarimizning hamjixatlikda ish olib borib, ko‘chalarimiz obodligi yo‘lida birdamligimiz natijasidir. Bundan tashqari joriy yilda Nasaf ko‘chasiga bitta yangi transformator va 8 ta beton tayanch ustunlari o‘rnatilib shu hududdagi aholining elektr energiyasi bo‘yicha mavjud muammolari bartaraf etildi.
Suhbat davomida kelgusi yil uchun ham mahallaning o‘z rejalari bor ekanligi, ya’ni qolgan ichki yo‘llarni ham asfaltlashtirish, elektr energiyasida muammo bo‘lib turgan hududlarni yangi va zamonaviy uskunalar bilan ta’minlash hamda bolajonlar uchun yopiq suv havzasi, sport maydonchalari qurish niyatida ekanliklarni ham ta’kidlab o‘tdilar.
Bu kabi ishlarda mahallaning ishbilarmon va tadbirkorlarining alohida hissasi bor. Hududda kichik biznes va tadbirkorlik bilan shug‘ullanuchi fuqarolar soni kundan kunga oshib bormoqda.
– Joriy yil boshidan bugungi kunga qadar 100 nafardan ziyod fuqarolarimizga 5 milliondan 100 million so‘mgacha bo‘lgan miqdorda turli maqsadlar uchun imtiyozli kreditlar ajratildi. Bu esa mahallaning ishbilarmonlik qobiliyatini oshirib, ishsizlik muammolarini bartaraf etishga katta hissa qo‘shmoqda, desak mubolag‘a bo‘lmaydi, – deydi mahalla hokim yordamchisi Nodirbek Nabiyev. – Boisi birgina tikuvchilik sexining ishga tushirilishi natijasida 20 nafardan ortiq ayol-qizlarimiz doimiy ish bilan band bo‘lishdi.
Bundan tashqari yilning shu davriga qadar 20 nafar ayollar kasb-hunarga o‘qitilib biznesga birinchi qadam loyihasi asosida ish boshlashlariga ko‘maklashildi. Bu ishlarda mahalla hokim yordamchisi, xotin-qizlar faoli va mahalla bankirining xizmatlari katta bo‘ldi. Mahallada kambag‘al oilalarni kambag‘allikdan chiqarish borasida ham tizimli ishlar amalga oshirilyapti. Ulardan ishlash imkoniyati borlarini ishga joylash, nogironligi bor fuqarolarga ijtimoiy xizmatlar ko‘rsatilishini yo‘lga qo‘yish, farzandlarini maktab va maktabgacha ta’lim tashkilotlarga imtiyozli joylash ishlari samarali tarzda olib borilayotganiga guvoh bo‘ldik.
Yana bir islohot – pensiya yoshiga yetgan fuqarolar endi turli tashkilotlar eshigi oldida navbat kutishlari shart emas. Mahallaning o‘zida onlayn tarzda pensiyaga chiqish arizasi qabul qilinib ortiqcha ovoragarchiliklar bartaraf qilinib aholining og‘iri yengil bo‘layotganidan mamnunlar. Yurtimizda amalga oshirilayotgan keng qamrovli islohotlar fuqarolarimiz hayotini farovon, turmushini go‘zal bo‘lishi, yoshlarimizning emin-erkin kamol topib kelajakda yurt ravnaqi uchun hissa qo‘shadigan kadrlar bo‘lib yetishishlari uchun hayotga tadbiq etilayotganidan mahalla aholisi mamnun.
Husnidaxon YAKUBOVA,
“Toshloq tongi” muxbiri.
***
ОИЛАЛАР БИРЛИГИ, ҲАМЖИХАТЛИК МАСКАНИ
Туманимизнинг Қипчоқариқ маҳалла фуқаролар йиғини ўзининг тадбиркор, чорвадор ва дехқонлари билан туманимизда ўз ўрнига эга маҳаллалардан бири ҳисобланади. Ушбу масканга қилган сафаримизда бизга маҳалла ҳоким ёрдамчиси Нодирбек Набиев ҳамроҳлик қилди.
Маҳалла асосан 3 та – Қипчоқариқ, Бектўпи ва Насаф кўчаларидан иборат бўлиб ҳудудда 724 та хонадон, 1149 та оила, уларда эса 4025 нафар аҳоли истиқомат қилади. Маҳалланинг 37 гектар майдони аҳоли хонадонлари учун берилган бўлиб, асосан улар деҳқончилик ва чорвачилик билан шуғулланадилар. 1 та умумий ўрта таълим мактаби, 10 дан ортиқ давлат ва нодавлат мактабгача таълим ташкилотларида маҳалла болаларига сифатли таълим-тарбия бериб келинаётган бўлса, мавжуд оилавий шифокорлик пунктида фуқароларга тиббий хизмат кўрсатиб келинмоқда.
Маҳалла узоқ тарихга эга. Ҳудудда иккита — “Маҳсум ота” ва “Қулоқ ота” зиёратгоҳлари мавжуд бўлиб бу зиёратгоҳларга узоқ яқиндан зиёратчилар оқими тинмайди. Бу зиёратгоҳларнинг ўзига яраша тарихи борлигини таъкидлашди.
Маҳалла аҳолисининг бугунидан рози, эртасига умид билан яшашлари йўлида маҳалла еттилиги туну-кун ҳаракатда. Маҳалла раиси Эркинжон Усмонов бошчилигидаги жамоа саъй-ҳаракатлари билан маҳалла тумандаги илғор ҳудудлар сарасига кириб улгурган. Улар маҳалладаги камбағал оилаларни камбағалликдан чиқариш, ишсизларни иш билан таъминлаш, тадбиркорлик истагидаги фуқароларга иш бошлашлари учун йўл-йўриқлар кўрсатиш баробарида зарур кредит маблағларини олишларига кўмаклашиш, ёшларни билим олиб юрт равнақи учун ҳисса қўшадиган кадрлар бўлиб етишишлари йўлида ўзларидаги бор билим ва кўникмаларини сафарбар қилиб келмоқдалар.
– Бу йилги қувонарли ютуқларимиздан бири “Ташаббусли бюджет” лойиҳасида маҳалламиз иштирок этиб 1 ярим миллиард сўм эвазига ҳудудимизнинг 3089 метр ички йўлларини асфальтлаштириш имкониятига эга бўлганимиз,- дейди мамнуният билан маҳалла раиси Э. Усмонов. – Бу албатта фуқароларимизнинг ҳамжихатликда иш олиб бориб, кўчаларимиз ободлиги йўлида бирдамлигимиз натижасидир. Бундан ташқари жорий йилда Насаф кўчасига битта янги трансформатор ва 8 та бетон таянч устунлари ўрнатилиб шу ҳудуддаги аҳолининг электр энергияси бўйича мавжуд муаммолари бартараф этилди.
Суҳбат давомида келгуси йил учун ҳам маҳалланинг ўз режалари бор эканлиги, яъни қолган ички йўлларни ҳам асфальтлаштириш, электр энергиясида муаммо бўлиб турган ҳудудларни янги ва замонавий ускуналар билан таъминлаш ҳамда болажонлар учун ёпиқ сув ҳавзаси, спорт майдончалари қуриш ниятида эканликларни ҳам таъкидлаб ўтдилар.
Бу каби ишларда маҳалланинг ишбилармон ва тадбиркорларининг алоҳида ҳиссаси бор. Ҳудудда кичик бизнес ва тадбиркорлик билан шуғулланучи фуқаролар сони кундан кунга ошиб бормоқда.
– Жорий йил бошидан бугунги кунга қадар 100 нафардан зиёд фуқароларимизга 5 миллиондан 100 миллион сўмгача бўлган миқдорда турли мақсадлар учун имтиёзли кредитлар ажратилди. Бу эса маҳалланинг ишбилармонлик қобилиятини ошириб, ишсизлик муаммоларини бартараф этишга катта ҳисса қўшмоқда, десак муболаға бўлмайди, – дейди маҳалла ҳоким ёрдамчиси Нодирбек Набиев. – Боиси биргина тикувчилик цехининг ишга туширилиши натижасида 20 нафардан ортиқ аёл-қизларимиз доимий иш билан банд бўлишди.
Бундан ташқари йилнинг шу даврига қадар 20 нафар аёллар касб-ҳунарга ўқитилиб бизнесга биринчи қадам лойиҳаси асосида иш бошлашларига кўмаклашилди. Бу ишларда маҳалла ҳоким ёрдамчиси, хотин-қизлар фаоли ва маҳалла банкирининг хизматлари катта бўлди. Маҳаллада камбағал оилаларни камбағалликдан чиқариш борасида ҳам тизимли ишлар амалга ошириляпти. Улардан ишлаш имконияти борларини ишга жойлаш, ногиронлиги бор фуқароларга ижтимоий хизматлар кўрсатилишини йўлга қўйиш, фарзандларини мактаб ва мактабгача таълим ташкилотларга имтиёзли жойлаш ишлари самарали тарзда олиб борилаётганига гувоҳ бўлдик.
Яна бир ислоҳот – пенсия ёшига етган фуқаролар энди турли ташкилотлар эшиги олдида навбат кутишлари шарт эмас. Маҳалланинг ўзида онлайн тарзда пенсияга чиқиш аризаси қабул қилиниб ортиқча оворагарчиликлар бартараф қилиниб аҳолининг оғири енгил бўлаётганидан мамнунлар. Юртимизда амалга оширилаётган кенг қамровли ислоҳотлар фуқароларимиз ҳаётини фаровон, турмушини гўзал бўлиши, ёшларимизнинг эмин-эркин камол топиб келажакда юрт равнақи учун ҳисса қўшадиган кадрлар бўлиб етишишлари учун ҳаётга тадбиқ этилаётганидан маҳалла аҳолиси мамнун.
Ҳуснидахон ЯКУБОВА,
“Тошлоқ тонги” мухбири.
About The Author
