Toshkentpatir, Qo‘qonpatir, ammo Qipchoqariq patiri og‘izga tatir. Dasturxonlarimizga birinchi navbatda qo‘yiladigan aziz ne’mat—nondir. Nonvoylar esa ushbu ne’matni yaratish uchun necha bor tandir bag‘riga kirib chiqadilar. Ko‘zni quvontirib, dimoqlarni qitiqlaydigan qaynoq patir isi qipchoqariqlik Shahnozaxon Usmonovaning xonadonidan hamisha taralib turadi. Mana 12 yildirki patir yopib ko‘plab insonlarning dasturxoniga piyozli, qoqili xushta’m patirlarni yetkazib bermoqda.
Aslida nonvoylik kasbini ko‘proq erkaklar tanlasa-da, ammo Shahno-zaxonning yoshligida buvisi yopib beradigan piyozli, qoqili yog‘li patir maqtovi uni ushbu hunarni tanlashiga sabab bo‘lgan. Onasidan buvisi tayyorlaydigan patir sirini o‘rganib kelin bo‘lib tushgan xonadonida nonvoylik hunarini yo‘lga qo‘ygan Shahnozaxonning qaynota-qaynonasi, turmush o‘rtog‘i bilan boshlangan patirchilik hunari keyinchalik qo‘shni xotin-qizlarni ish bilan band qilishga turtki bo‘ldi.
—Avvaliga yopilgan patirlarni o‘z hududimizdagi do‘konlarga tarqatar edik. Mana besh yildan buyon patirlarimizni Farg‘ona, Marg‘ilon hamda tumanimiz bozorlari, do‘konlarga tarqatuvchi ishchilarimiz topshirib keladilar. Kuniga 1000 ta, ro‘za paytlarida undanda oshirib patir yopiladi. Patirlarimizga maxsus tabiiy yog‘, pomidor qoqisi, piyoz solib tayyorlanadi,—deydi Sh. Usmonova.
O‘tgan yili mahalla hokim yordamchisi tavsiyasi bilan 33 million so‘m imtiyozli kredit olgan tadbirkor ish unumi ortishi uchun xamir qorish uskunasi hamda kerakli mahsulotlarni xarid qilib ushbu kreditni o‘z vaqtida qaytarishga ham ulgurgan. Shu bois hozirda o‘ndan ortiq ishchi o‘rni yaratilib, 6 nafar ishchilar xamir ishlari bilan shug‘ullanishsa, 3 nafari patir yetkazib beradilar. Oila a’zolarining ham o‘z yumushlari bor. Patir xamirini turmush o‘rtog‘i Axbobjon Ibragimov me’yoriga yetkazib tayyorlasa, tandirda Sh. Usmonova ukasi Abdumalik Toshahmadov bilan patir yopish bo‘yicha mohir nonvoyga aylanishgan.
Xonadonda uchta tandir bo‘lib har biriga 70 tadan patir yopiladi. Ish vaqti tungi 2 yarimdan boshlanib ertalabki to‘qqizda tugaydi. Ishchilar ham qilgan mehnatidan rozi. Ularga ishiga qarab 100 ming so‘mdan 250 ming so‘mgacha kunlik ish haqi beriladi. Bir kunda 7 qop, yakshanba kunlari esa 9 qop undan xamir tayyorlanib patir yopiladi.
—Hamma uxlaydigan vaqtda ish boshlab tongda tugatamiz. Qilayotgan mehnatimga, uyqusiz tunlarimga achinmayman. Shu hunar ortidan uylarimizni yaxshilab, uchta farzandimizni kamolga yetkazmoqdamiz. Meni eng quvontiradigan jihati— katta farzandim Shohjahon Abdubannopovni shu hunar ortidan futbol maktabida o‘qitdik. Hozirda Qashqadaryo viloyatining “Sho‘rtan” futbol komandasida to‘p surmoqda. Yana bir narsadan quvonamanki, yopgan patirlarimiz manzur bo‘lgan insonlar kelib duo qiladilar. Shu damda qilgan mehnatlarimdan rozi bo‘lib charchoqlarim yoziladi,—deydi Sh. Usmonova.
Bugun tadbirkorlikda xotin-qizlarimiz faol bo‘lmoqda. Ular turmush o‘rtoqlariga birday yelkadosh bo‘lib hunari, aql-idroki bilan hurmat qozonmoqdalar. Har bir oilada mana shunday bitta tadbirkor ayol bor ekan, xonadonlarimiz fayzi, dasturxonlarimiz to‘kinligi, farzandlar kelajagi ta’minlanaveradi.
Shohistaxon
RAHIMOVA.
***
МЕҲНАТИДАН БАРАКА ТОПАЁТГАН АЁЛ
Тошкентпатир, Қўқонпатир, аммо Қипчоқариқ патири оғизга татир. Дастурхонларимизга биринчи навбатда қўйиладиган азиз неъмат—нондир. Нонвойлар эса ушбу неъматни яратиш учун неча бор тандир бағрига кириб чиқадилар. Кўзни қувонтириб, димоқларни қитиқлайдиган қайноқ патир иси қипчоқариқлик Шаҳнозахон Усмонованинг хонадонидан ҳамиша таралиб туради. Мана 12 йилдирки патир ёпиб кўплаб инсонларнинг дастурхонига пиёзли, қоқили хуштаъм патирларни етказиб бермоқда.
Аслида нонвойлик касбини кўпроқ эркаклар танласа-да, аммо Шаҳно-захоннинг ёшлигида бувиси ёпиб берадиган пиёзли, қоқили ёғли патир мақтови уни ушбу ҳунарни танлашига сабаб бўлган. Онасидан бувиси тайёрлайдиган патир сирини ўрганиб келин бўлиб тушган хонадонида нонвойлик ҳунарини йўлга қўйган Шаҳнозахоннинг қайнота-қайнонаси, турмуш ўртоғи билан бошланган патирчилик ҳунари кейинчалик қўшни хотин-қизларни иш билан банд қилишга туртки бўлди.
—Аввалига ёпилган патирларни ўз ҳудудимиздаги дўконларга тарқатар эдик. Мана беш йилдан буён патирларимизни Фарғона, Марғилон ҳамда туманимиз бозорлари, дўконларга тарқатувчи ишчиларимиз топшириб келадилар. Кунига 1000 та, рўза пайтларида унданда ошириб патир ёпилади. Патирларимизга махсус табиий ёғ, помидор қоқиси, пиёз солиб тайёрланади,—дейди Ш. Усмонова.
Ўтган йили маҳалла ҳоким ёрдамчиси тавсияси билан 33 миллион сўм имтиёзли кредит олган тадбиркор иш унуми ортиши учун хамир қориш ускунаси ҳамда керакли маҳсулотларни харид қилиб ушбу кредитни ўз вақтида қайтаришга ҳам улгурган. Шу боис ҳозирда ўндан ортиқ ишчи ўрни яратилиб, 6 нафар ишчилар хамир ишлари билан шуғулланишса, 3 нафари патир етказиб берадилар. Оила аъзоларининг ҳам ўз юмушлари бор. Патир хамирини турмуш ўртоғи Ахбобжон Ибрагимов меъёрига етказиб тайёрласа, тандирда Ш. Усмонова укаси Абдумалик Тошаҳмадов билан патир ёпиш бўйича моҳир нонвойга айланишган.
Хонадонда учта тандир бўлиб ҳар бирига 70 тадан патир ёпилади. Иш вақти тунги 2 яримдан бошланиб эрталабки тўққизда тугайди. Ишчилар ҳам қилган меҳнатидан рози. Уларга ишига қараб 100 минг сўмдан 250 минг сўмгача кунлик иш ҳақи берилади. Бир кунда 7 қоп, якшанба кунлари эса 9 қоп ундан хамир тайёрланиб патир ёпилади.
—Ҳамма ухлайдиган вақтда иш бошлаб тонгда тугатамиз. Қилаётган меҳнатимга, уйқусиз тунларимга ачинмайман. Шу ҳунар ортидан уйларимизни яхшилаб, учта фарзандимизни камолга етказмоқдамиз. Мени энг қувонтирадиган жиҳати— катта фарзандим Шоҳжаҳон Абдубанноповни шу ҳунар ортидан футбол мактабида ўқитдик. Ҳозирда Қашқадарё вилоятининг “Шўртан” футбол командасида тўп сурмоқда. Яна бир нарсадан қувонаманки, ёпган патирларимиз манзур бўлган инсонлар келиб дуо қиладилар. Шу дамда қилган меҳнатларимдан рози бўлиб чарчоқларим ёзилади,—дейди Ш. Усмонова.
Бугун тадбиркорликда хотин-қизларимиз фаол бўлмоқда. Улар турмуш ўртоқларига бирдай елкадош бўлиб ҳунари, ақл-идроки билан ҳурмат қозонмоқдалар. Ҳар бир оилада мана шундай битта тадбиркор аёл бор экан, хонадонларимиз файзи, дастурхонларимиз тўкинлиги, фарзандлар келажаги таъминланаверади.
Шоҳистахон
РАҲИМОВА.
About The Author
