bir qarashda 100 dollar katta summa emasdek tuyulishi mumkin, ammo…
Farg‘ona viloyati Uchko‘prik tumani jinoyat ishlari bo‘yicha sudida ko‘rilgan, asosiy gumonlanuvchilari tuman ta’lim tizimi rahbarlari bo‘lgan poraxo‘rlik ishi bo‘yicha chiqarilgan hukm nafaqat aybdor shaxslarga jazo, balki butun tizim uchun katta saboq bo‘ldi.
Uchko‘prik tumani Maktabgacha va maktab ta’limi bo‘limi boshlig‘i (ism va familiyalar o‘zgartirilgan) Azim Tohirov va ekspluatatsiya bo‘limi boshlig‘i Obid Yusupovlar lavozim mavqeidan foydalanib 2025 yil fevral oyida 18-sonli maktabgacha ta’lim muassasasi rahbari M. Qosimovadan bo‘lim xarajatlari va tekshiruvlarni bartaraf qilish bahonasida 100 AQSH dollari talab qilishgan. Tezkor tadbirda Obid Yusupov pulni olayotganda qo‘lga olindi. Bir qarashda 100 dollar katta summa emasdek tuyulishi mumkin, ammo u butun ta’lim tizimiga ishonchni yo‘qotadi.
Tezkor tadbirda O. Yusupov 100 AQSH dollarini o‘z rahbari A. Tohirovga berish uchun olgan vaqtida ushlangan.
Gumonlanuvchi O. Yusupov muqaddam jinoyat ishlari bo‘yicha Uchko‘prik tuman sudining 2025 yil 12 fevraldagi hukmiga ko‘ra O‘zbekiston Respublikasi JKning 167-moddasi 2-qismi “v,g” bandlari, 168-moddasi 3-qismi “v” bandi bilan 1 yil 6 oy muddatga mansabdorlik va moddiy javobgarlik yuklatilgan lavozimlarda ishlash huquqidan mahrum qilinib, ish haqining 20 foizini davlat daromadi hisobiga ushlab qolgan holda 2 yil 6 oy muddatga ahloq tuzatish ishlari jazosi tayinlangan edi. Lekin o‘ziga tegishli xulosa chiqarmagan O. Yusupov yana jinoyatga qo‘l urdi.
Sud jarayonida ayblanuvchilar aybini tan olishmadi, ushbu pul mablag‘larini “qarz” sifatida olganlarini aytib jazodan qutulmoqchi bo‘ldilar. Biroq, guvohlar ko‘rsatmalari va tergov materiallari ularning aybini isbotladi. Natijada sud qaroriga ko‘ra Azim Tohirov 2 yilga ozodlikdan mahrum etilib mansabdorlik lavozimlarida ishlash huquqidan mahrum qilindi. Obid Yusupov esa avvalgi hukm bilan qo‘shib hisoblanib, 2 yil 2 oy muddatga ozodlikdan mahrum etildi.
“Agar rahbarlar pora bilan shug‘ullansa, bolalar kelajagi xavf ostida qoladi. Sudning qat’iy hukmi odilona bo‘ldi” deya baralla aytish mumkin. Ta’lim tizimidagi har bir rahbar o‘z mas’uliyatini anglashi kerak. Chunki poraxo‘rlik faqat qonun buzilishi emas, balki jamiyat ma’naviyatiga zarba hisoblanadi. Bu hukm ikki shaxs uchun jazo bo‘lishi bilan birga, butun tizim uchun ham katta saboq.
M. HASANOV,
Farg‘ona viloyat prokuraturasi shaxsiy xavfsizlik bo‘limi prokurori.
***
ТАЪМАГИР МАОРИФЧИЛАР
бир қарашда 100 доллар катта сумма эмасдек туюлиши мумкин, аммо…
Фарғона вилояти Учкўприк тумани жиноят ишлари бўйича судида кўрилган, асосий гумонланувчилари туман таълим тизими раҳбарлари бўлган порахўрлик иши бўйича чиқарилган ҳукм нафақат айбдор шахсларга жазо, балки бутун тизим учун катта сабоқ бўлди.
Учкўприк тумани Мактабгача ва мактаб таълими бўлими бошлиғи (исм ва фамилиялар ўзгартирилган) Азим Тоҳиров ва эксплуатация бўлими бошлиғи Обид Юсуповлар лавозим мавқеидан фойдаланиб 2025 йил февраль ойида 18-сонли мактабгача таълим муассасаси раҳбари М. Қосимовадан бўлим харажатлари ва текширувларни бартараф қилиш баҳонасида 100 АҚШ доллари талаб қилишган. Тезкор тадбирда Обид Юсупов пулни олаётганда қўлга олинди. Бир қарашда 100 доллар катта сумма эмасдек туюлиши мумкин, аммо у бутун таълим тизимига ишончни йўқотади.
Тезкор тадбирда О. Юсупов 100 АҚШ долларини ўз раҳбари А. Тоҳировга бериш учун олган вақтида ушланган.
Гумонланувчи О. Юсупов муқаддам жиноят ишлари бўйича Учкўприк туман судининг 2025 йил 12 февралдаги ҳукмига кўра Ўзбекистон Республикаси ЖКнинг 167-моддаси 2-қисми “в,г” бандлари, 168-моддаси 3-қисми “в” банди билан 1 йил 6 ой муддатга мансабдорлик ва моддий жавобгарлик юклатилган лавозимларда ишлаш ҳуқуқидан маҳрум қилиниб, иш ҳақининг 20 фоизини давлат даромади ҳисобига ушлаб қолган ҳолда 2 йил 6 ой муддатга аҳлоқ тузатиш ишлари жазоси тайинланган эди. Лекин ўзига тегишли хулоса чиқармаган О. Юсупов яна жиноятга қўл урди.
Суд жараёнида айбланувчилар айбини тан олишмади, ушбу пул маблағларини “қарз” сифатида олганларини айтиб жазодан қутулмоқчи бўлдилар. Бироқ, гувоҳлар кўрсатмалари ва тергов материаллари уларнинг айбини исботлади. Натижада суд қарорига кўра Азим Тоҳиров 2 йилга озодликдан маҳрум этилиб мансабдорлик лавозимларида ишлаш ҳуқуқидан маҳрум қилинди. Обид Юсупов эса аввалги ҳукм билан қўшиб ҳисобланиб, 2 йил 2 ой муддатга озодликдан маҳрум этилди.
“Агар раҳбарлар пора билан шуғулланса, болалар келажаги хавф остида қолади. Суднинг қатъий ҳукми одилона бўлди” дея баралла айтиш мумкин. Таълим тизимидаги ҳар бир раҳбар ўз масъулиятини англаши керак. Чунки порахўрлик фақат қонун бузилиши эмас, балки жамият маънавиятига зарба ҳисобланади. Бу ҳукм икки шахс учун жазо бўлиши билан бирга, бутун тизим учун ҳам катта сабоқ.
М. ҲАСАНОВ,
Фарғона вилоят прокуратураси шахсий хавфсизлик бўлими прокурори.
About The Author
