Tumanimiz markazidan 20 kilometr uzoqlikda joylashgan 23-umumta’lim maktabi o‘z faoliyatini 1964 yilda boshlagan bo‘lib, o‘sha vaqtda unda atigi 4 ta o‘quv xonasi mavjud edi. Aholi sonining o‘sib borishi va ta’limga bo‘lgan talabni inobatga olgan holda keyingi yillarda maktab bir necha bor kengaytirildi va sig‘imi 240 o‘ringa yetkazildi. Biroq bu o‘zgarishlar ham aholining to‘liq ehtiyojini qondirishga yetarli emas edi. Ayniqsa o‘quvchilar soni yildan-yilga ko‘payib borishi natijasida ba’zan 2, hatto 3 navbatda ta’lim olish holatlari kuzatilardi.
Shu bois Investitsiya dasturi doirasida bu ta’lim maskanini tubdan yangilash bo‘yicha chora-tadbirlar belgilanib qurilish ishlari boshlab yuborildi. Unga muvofiq 8 milliard so‘m mablag‘ evaziga zamonaviy arxitektura talablariga to‘liq javob beradigan, 3 qavatli 540 o‘ringa mo‘ljallangan yangi maktab binosi barpo etildi.
Qad rostlagan yangi ta’lim muassasasi keng va yorug‘ sinfxonalar, zamonaviy fizika-kimyo laboratoriyalari, kutubxona, axborot resurs markazi hamda xalq ta’limi standartlariga mos o‘quv anjomlari bilan jihozlandi. Binoning ichki va tashqi infratuzilmasi xavfsiz, qulay va o‘quv jarayonini barqaror tashkil etish imkonini beradi.
Ushbu ishlar nafaqat ta’lim sifatini oshirish, balki bolalarning ilmiy-tahliliy fikrlashini rivojlantirish, innovatsion yondashuvlarni qo‘llab-quvvatlashga xizmat qiladi.
Yangi binoda imkoniyati cheklangan o‘quvchilar uchun ham alohida sharoitlar yaratilgan. Maktab maxsus panduslar, ko‘tarma yo‘laklar va lift bilan ta’minlangan bo‘lib, inklyuziv ta’limning zamonaviy talablariga ham to‘liq javob beradi.
Bu esa O‘zbekiston Respublikasi Konstitutsiyasining 50-moddasida belgilangan — “ Har kim ta’lim olish huquqiga ega. Davlat uzluksiz ta’lim tizimi, uning har xil turlari va shakllari, davlat va nodavlat ta’lim tashkilotlari rivojlanishini ta’minlaydi. Ta’lim tashkilotlarida alohida ta’lim ehtiyojlariga ega bo‘lgan bolalar uchun inklyuziv ta’lim va tarbiya ta’minlanadi” degan qoida amalda o‘z ifodasini topayotganining yaqqol misolidir.
Maktab yangi binosining ochilish marosimida Toshloq tumani hokimi Abduqahhor Djurabayev ishtirok etib mazkur ta’lim maskani foydalanishga topshirilishi tuman hayotidagi ulkan voqea ekanini ta’kidladi. U o‘z nutqida “Bugun foydalanishga topshirilayotgan ushbu maktab nafaqat yoshlar ta’limini sifat jihatdan yangi bosqichga olib chiqadi, balki tumanimiz ijtimoiy infratuzilmasini yanada rivojlantirishga xizmat qiladi. Eng muhimi, farzandlarimiz zamonaviy sharoitlarda bilim olib, kelajakda mamlakatimiz ravnaqi uchun munosib kadrlar bo‘lib yetishadi”, deya ta’kidladi.
E. BAKIROV,
23-umumiy o‘rta ta’lim maktabi direktori.
***
Туманимиз марказидан 20 километр узоқликда жойлашган 23-умумтаълим мактаби ўз фаолиятини 1964 йилда бошлаган бўлиб, ўша вақтда унда атиги 4 та ўқув хонаси мавжуд эди. Аҳоли сонининг ўсиб бориши ва таълимга бўлган талабни инобатга олган ҳолда кейинги йилларда мактаб бир неча бор кенгайтирилди ва сиғими 240 ўринга етказилди. Бироқ бу ўзгаришлар ҳам аҳолининг тўлиқ эҳтиёжини қондиришга етарли эмас эди. Айниқса ўқувчилар сони йилдан-йилга кўпайиб бориши натижасида баъзан 2, ҳатто 3 навбатда таълим олиш ҳолатлари кузатиларди.
Шу боис Инвестиция дастури доирасида бу таълим масканини тубдан янгилаш бўйича чора-тадбирлар белгиланиб қурилиш ишлари бошлаб юборилди. Унга мувофиқ 8 миллиард сўм маблағ эвазига замонавий архитектура талабларига тўлиқ жавоб берадиган, 3 қаватли 540 ўринга мўлжалланган янги мактаб биноси барпо этилди.
Қад ростлаган янги таълим муассасаси кенг ва ёруғ синфхоналар, замонавий физика-кимё лабораториялари, кутубхона, ахборот ресурс маркази ҳамда халқ таълими стандартларига мос ўқув анжомлари билан жиҳозланди. Бинонинг ички ва ташқи инфратузилмаси хавфсиз, қулай ва ўқув жараёнини барқарор ташкил этиш имконини беради.
Ушбу ишлар нафақат таълим сифатини ошириш, балки болаларнинг илмий-таҳлилий фикрлашини ривожлантириш, инновацион ёндашувларни қўллаб-қувватлашга хизмат қилади.
Янги бинода имконияти чекланган ўқувчилар учун ҳам алоҳида шароитлар яратилган. Мактаб махсус пандуслар, кўтарма йўлаклар ва лифт билан таъминланган бўлиб, инклюзив таълимнинг замонавий талабларига ҳам тўлиқ жавоб беради.
Бу эса Ўзбекистон Республикаси Конституциясининг 50-моддасида белгиланган — “ Ҳар ким таълим олиш ҳуқуқига эга. Давлат узлуксиз таълим тизими, унинг ҳар хил турлари ва шакллари, давлат ва нодавлат таълим ташкилотлари ривожланишини таъминлайди. Таълим ташкилотларида алоҳида таълим эҳтиёжларига эга бўлган болалар учун инклюзив таълим ва тарбия таъминланади” деган қоида амалда ўз ифодасини топаётганининг яққол мисолидир.
Мактаб янги биносининг очилиш маросимида Тошлоқ тумани ҳокими Абдуқаҳҳор Джурабаев иштирок этиб мазкур таълим маскани фойдаланишга топширилиши туман ҳаётидаги улкан воқеа эканини таъкидлади. У ўз нутқида “Бугун фойдаланишга топширилаётган ушбу мактаб нафақат ёшлар таълимини сифат жиҳатдан янги босқичга олиб чиқади, балки туманимиз ижтимоий инфратузилмасини янада ривожлантиришга хизмат қилади. Энг муҳими, фарзандларимиз замонавий шароитларда билим олиб, келажакда мамлакатимиз равнақи учун муносиб кадрлар бўлиб етишади”, дея таъкидлади.
Э. БАКИРОВ,
23-умумий ўрта таълим мактаби директори.
About The Author
