MAQSADIMIZ XALQIMIZGA MALAKALI TIBBIY XIZMAT KO‘RSATISH
2003 yili Andijon Davlat Tibbiyot institutining davolash ishi yo‘nalishini tamomlab mehnat faoliyatimni boshlagandim. Bilim va malakamni yanada oshirish maqsadida 2010–2012 yillarda shu institutning terapiya kafedrasida klinik ordinaturada o‘qib, ilmiy va amaliy ko‘nikmalarimni yanada chuqurlashtirdim. 2013 yili esa Toshkent vrachlar malaka oshirish institutining Pulmonologiya va klinik allergologiya kafedrasida qayta tayyorlash kurslarini muvaffaqiyatli yakunlab, mutaxassis sifatida malakamni oshirdim.
Hozirgi kunda Toshloq tumanidagi ko‘p tarmoqli Markaziy poliklinikasida oliy toifali shifokor-pulmonolog sifatida faoliyat yuritib kelmoqdaman. Xalqimiz salomatligini saqlash borasida olib borayotgan faoliyatim ustozlarimdan olgan bilim, tajriba va ular o‘rgatgan insonparvarlik tamoyillariga tayanadi.
Tibbiyot sohasidagi yutuqlarning asosida davlatimiz tomonidan amalga oshirilayotgan keng qamrovli islohotlar, xususan fuqarolar sog‘ligini muhofaza qilish borasidagi strategik qarorlar turibdi. O‘zbekiston Respublikasi Konstitutsiyasining 48-moddasida belgilanganidek, har bir fuqaro sog‘lig‘ini saqlash va malakali tibbiy xizmatdan foydalanish huquqiga egadir. Davlat esa tibbiy xizmatning davlat va nodavlat shakllarini rivojlantirish, sog‘liqni saqlash tizimini takomillashtirish, tibbiy sug‘urtaning turli modellarini joriy etish uchun zarur imkoniyatlarni yaratib berish mas’uliyatini zimmasiga olgan.
Bugun men ishlaydigan muassasada ham shifokorlar uchun yaratilayotgan sharoitlar, tibbiy anjomlarni zamon talabiga moslashtirish, xodimlarning huquqlarini himoya qilishga qaratilgan chora-tadbirlar faoliyatimizga kuch, yangicha yondashuvlar va ijodkorlik ruhini bag‘ishlamoqda.
Shifokorning mehnati og‘ir, mas’uliyatli va bag‘oyat katta intizom talab qiladi. Biroq shu bilan birga, bu kasb inson hayotiga daxldorligi bilan men uchun eng oliy qadriyatdir.
Biz shifokorlar xalqimizga sifatli tibbiy xizmat ko‘rsatib o‘z burchimizni bajarayotganimizdan faxrlanamiz. Konstitutsiyamizdagi insonparvarlik, farovonlik va sog‘lom turmushni ta’minlashga qaratilgan asosiy prinsiplar bizning faoliyatimizda ham o‘z aksini topmoqda.
Marhaboxon QORABOYEVA,
tuman ko‘p tarmoqli poliklinikasi shifokor-pulmonologi.

***

МАҚСАДИМИЗ ХАЛҚИМИЗГА МАЛАКАЛИ ТИББИЙ ХИЗМАТ КЎРСАТИШ

2003 йили Андижон Давлат Тиббиёт институтининг даволаш иши йўналишини тамомлаб меҳнат фаолиятимни бошлагандим. Билим ва малакамни янада ошириш мақсадида 2010–2012 йилларда шу институтнинг терапия кафедрасида клиник ординатурада ўқиб, илмий ва амалий кўникмаларимни янада чуқурлаштирдим. 2013 йили эса Тошкент врачлар малака ошириш институтининг Пульмонология ва клиник аллергология кафедрасида қайта тайёрлаш курсларини муваффақиятли якунлаб, мутахассис сифатида малакамни оширдим.
Ҳозирги кунда Тошлоқ туманидаги кўп тармоқли Марказий поликлиникасида олий тоифали шифокор-пульмонолог сифатида фаолият юритиб келмоқдаман. Халқимиз саломатлигини сақлаш борасида олиб бораётган фаолиятим устозларимдан олган билим, тажриба ва улар ўргатган инсонпарварлик тамойилларига таянади.
Тиббиёт соҳасидаги ютуқларнинг асосида давлатимиз томонидан амалга оширилаётган кенг қамровли ислоҳотлар, хусусан фуқаролар соғлигини муҳофаза қилиш борасидаги стратегик қарорлар турибди. Ўзбекистон Республикаси Конституциясининг 48-моддасида белгиланганидек, ҳар бир фуқаро соғлиғини сақлаш ва малакали тиббий хизматдан фойдаланиш ҳуқуқига эгадир. Давлат эса тиббий хизматнинг давлат ва нодавлат шаклларини ривожлантириш, соғлиқни сақлаш тизимини такомиллаштириш, тиббий суғуртанинг турли моделларини жорий этиш учун зарур имкониятларни яратиб бериш масъулиятини зиммасига олган.
Бугун мен ишлайдиган муассасада ҳам шифокорлар учун яратилаётган шароитлар, тиббий анжомларни замон талабига мослаштириш, ходимларнинг ҳуқуқларини ҳимоя қилишга қаратилган чора-тадбирлар фаолиятимизга куч, янгича ёндашувлар ва ижодкорлик руҳини бағишламоқда.
Шифокорнинг меҳнати оғир, масъулиятли ва бағоят катта интизом талаб қилади. Бироқ шу билан бирга, бу касб инсон ҳаётига дахлдорлиги билан мен учун энг олий қадриятдир.
Биз шифокорлар халқимизга сифатли тиббий хизмат кўрсатиб ўз бурчимизни бажараётганимиздан фахрланамиз. Конституциямиздаги инсонпарварлик, фаровонлик ва соғлом турмушни таъминлашга қаратилган асосий принциплар бизнинг фаолиятимизда ҳам ўз аксини топмоқда.
Марҳабохон ҚОРАБОЕВА,
туман кўп тармоқли поликлиникаси шифокор-пульмонологи.

About The Author